కొత్త పాతలలో ఏది మంచిది?
సాహితీమిత్రులారా!
మనవాళ్ళు అంటూవుంటారు
"గతకాలము మేలు వచ్చు కాలముకంటేన్" - అని,
మరికొందరేమో
"మంచిగతమున కొంచెమేనోయ్" - అంటుంటారు.
మొత్తానికి ఏది సరైనది
ఇది తెలియాలంటే
ఈ శ్లోకం చూడాల్సిందే.
ఇది కాళిదాసు "మాళవికాగ్నిమిత్రమ్"
నాటకంలో ప్రస్తావనలో ఉంది.
పురాణ మిత్యేవ న సాధు సర్వం
న చాపి కావ్యం నవ మిత్యవద్యమ్
నన్త పరీక్ష్యాన్యతర ద్భజంతే
మూఢ: పరప్రత్యయనేయబుద్ధి:
ఏది కూడ కేవలం పాతది
అనే కారణంతో మంచిదికాదు.
కొత్తదైనంత మాత్రాన
దోషయుక్తమైనదీ కాదు.
ఉత్తములైన వారు వాటిని పరీక్షించి
గుణాన్ని బట్టి మంచిదాన్నే తీసుకుంటారు.
అవివేకి ఇతరులమాటలపై
నమ్మకంతో నిర్ణయించుకుంటాడు.
మంచి చెడులను వస్తుధర్మమే
కారణంగాని కాలం కారణం కాదు. - అని భావం.
పాతది మంచిది కొత్తది చెడ్డది అనే అపోహ
కాళిదాసు కాలం నుంచీ ఉందని దీన్నిబట్టి తెలుస్తుంది.
ఈ అభిప్రాయాన్ని నిర్ద్వంద్వంగా ఖండిస్తున్నాడు కాళిదాసు.
మంచి చెడ్డలు గతంలోను వర్తమానంలోను
భవిష్యత్తులోను ఉంటాయి అనేది అందరూ
ఆమోదించదగినది.
No comments:
Post a Comment