క్రాంతి తోడ మమ్ము గావఁగ సంక్రాంతి

క్రాంతి తోడ మమ్ము గావఁగ సంక్రాంతి 

సాహితీమిత్రులారా!

సంక్రాంతి ప్రతినెల వస్తుంది కాని
మకరసంక్రాంతికి ప్రత్యేకత ఎందుకంటే
పంటలుపండి ప్రజలంతా ఆనందోత్సాహతో
ఉంటారు. కాని ప్రతిసంక్రాంతి అలాజరగదు
మారిన కాలంలో సంక్రాంతిని
తన్నీరు బాలాజీగారు స్వాగతించిన
ఈ పద్యాలు చూడండి

హరిహరిలోరంగ హరియని శ్రీకాంతు
                ధ్యానించు మన హరిదాసులేరి !
హరహర మహాదేవ యనుచు శ్రీకంఠుని
                అవతారులగు జంగమయ్యలేరి !
డుడు బసవన్నల డోలుసన్నాయిల
                పలుగంగిరెద్దుల వారలేరి !
భుక్తి కొరకు దెచ్చుఁ భుజమున సంచిలో
                దానము వేయు వదాన్యులేరి !

సిరులులేనినాడు శ్రీహరిహరులకు
కూడులేదు మరియు గూడు లేదు
పంటలున్న వచ్చు - పసిడి సంక్రాంతికి
పూర్వ వైభవమ్ము పుడమిలోన

పాడి పంటతోడ పసిడి రాసులతోడ
భోగి మంట వోలె భుక్తి గలుగ
క్రాంతి తోడ మమ్ము గావఁగ సంక్రాంతి
లేమి కలిమి తేడ లేక రమ్ము!

తెలుగు వెలుగు

తెలుగు వెలుగు

సాహితీమిత్రులారా!

తన్నీరు బాలాజీగారి తెలుగు వెలుగు
వచనకవిత చూడండి

మనసు మమతలఁ బంచు
మంచి మానవతలఁ బెంచు
అమ్మపాల అమృతసుధ
మన తేటతెలుగుభాష

సామెతల సొంపు
నుడికారపు ఒంపు
జాతీయాల మేళవింపు
మన తెలుగుభాష

అక్షరలక్షల సుమసౌరభాలమాల
అవధాన శ్లేష ధ్వని ప్రక్రియల హేల
రసమయ జనపద ఫలాల వ్రేల
మన ఆంధ్రభాష

కదళీఫలము కన్న
కమ్మని వెన్నకన్న
మామిడితీపికన్న గోరుముద్దల రుచికన్న
మధురమైన మురిపెంపు భాష
మన మాతృభాష

తెలుగుమాట అందరినోట
వెలుగుబాట కావాలి
విశ్వం వినువీధిలో తెలుగు వెలుగు
వేగుచుక్క కావాలి

గురజాడ - అడుగుజాడ

గురజాడ - అడుగుజాడ

సాహితీమిత్రులారా!

మహాకవి గురజాడ అప్పారావును
ఆధునిక కవితలో చెప్పిన
తన్నీరు బాలాజిగారి సీసాన్ని చూద్దాం.

ముదు ముద్దు మాటల "ముత్యాలసరము"గా
                      గ్రుచ్చి మురిపెముగాఁ గూర్చినావు
కామాంధుకౌగిట కరిగిపోనివ్వక 
                      "కన్యక"ను చిచ్చుననం గాల్చినావు
"కన్యశుల్కము"నాడి కామిత ముదుసళ్ల
                      కన్నులు తెరిపింప కదలినావు
కాసుల తండ్రికి కనువిప్పు గల్పింప
                       "పూర్ణమ్మ"కు పురుడు పోసినావు

తెలుగు నింగిలోన వెలుగుల జాబిలి
తెలునాట నీదు "దిద్దుబాటు"
మంచి మానవతల బెంచి నడతుమయ్యా
అందరి గురజాడ - అడుగుజాడ

ఫ్యాషన్ వెఱ్ఱి

ఫ్యాషన్ వెఱ్ఱి

సాహితీమిత్రులారా!

పాతసినీమాలో ఒక పాటుంది. అదేమంటే
పిచ్చి రకరకాల పిచ్చి అని దీన్ని శ్రీమతి భానుమతిగారు  పాడారు.
ప్రతి ఒక్కరికీ ఒకరకమైన పిచ్చి అదే వెఱ్ఱి ఉంటుంది కాదంటారా.
మనదికూడా ఒకరకం పిచ్చే అదేమిటంటారా సాహిత్యం పిచ్చి.
ఈ పిచ్చివలన ఎవరికీ ఏమీ నష్టంలేదు.
కానీ సమాజంలోని విపరీతపు పోకడలను పిచ్చో వెఱ్ఱో అని
సర్దుకుపోవడం అలవాటైందిమనకు. ఇది చూడలేని
మన తన్నీరుగారికి ప్యాషన్ వెఱ్ఱి మీద
సాహిత్యపు పిచ్చిలో ఏదో జనానికి చెబుతున్నారు
చూద్దామామరి-

గణనాథుని జనులకు జాగృతి
నిమ్మని కొలుస్తూ ప్రారంభించాడు.

శ్రీగణనాథుని గొలిచెద
రాగలయిడుముల తరుమగ రయమున రాగన్
జాగున్ సేయక జనులకు
జాగృతి సలుపగ పలుశుభ జయముల నొసగన్


రాగిరంగులుఁబూసి రమ్యమందురుగాని
                        నల్లని కురులున్న నాతి యేది
చారెడు కన్నుల సౌరులు గన్పింప
                           కాటుకఁ బెట్టెడి కన్నులేవి
బంగరుమేనిని పరికించిఁ జూడగ
                            పసుపు మేనికిఁ బూయు పడతియేది
అందాల బొట్టుతో యలరించు స్త్రీమోము
                           నుదుట తిలకమున్న సుదతియేది
ఫ్యాషననుచు పసుపు పారాణి కుంకుమల్ 
ఒదలి, నాగరికత ఇదియె ననుచు 
భారతీయ యలఘు పావనరీతుల
మరువకమ్మ మగువ మనమునందు


తెల్గు జాణతనము దెల్పు జానుతెనుఁగు
                       ఉగ్గడింతురు నేడు  ఒత్తి ఒత్తి
తెలుగుసుదతి చీరదెచ్చు సొంపువదలి
                        ధరియించు జీన్స్ లు తరచి తరచి
ముంజేత గాజులు ముక్కుపుడకలేక
                        ముంగురులనుఁ జూచి మురిసి మురిసి
నల్లని వాల్జడ నడుమునకందమౌ
                        కురులద్రుంచి వదలు కొసరి కొసరి
ఫ్యాషననుచు ఆంధ్రప్రాభవంబు విడక
తేనెలొలుకు తేట తెలుగుభాష 
తెలుగు కట్టు బొట్టు తెలుగుజాతి పరువు
మరువకమ్మ మగువ మనమునందు

విద్య కొరకు వెదకు విలువ దెలియు

విద్య కొరకు వెదకు విలువ దెలియు

సాహితీమిత్రులారా!

నేటి చదువులు ఎలా ఉన్నయో?
ఒకనాడు ప్రహ్లాదుని హిరణ్యకశిపుడు చదువును గురించి అడిగితే
చదువులలోని మర్మమెల్ల చదివితి తండ్రీ అన్నాడట.
ఈనాడు విద్యార్థులు ఏమర్మమెరిగి చదువుతున్నరో!

నేటి విద్య పరిస్థితి గురించి తన్నీరుగారి ఈ పద్యం చూడండి

బ్రతుకు బాటనుఁజూపు బడిపంతులప్పుడు
         బడిబాటఁ బట్టెను పంతులిపుడు
ఆచార్యు దైవమ్ము  ఆనాడు శిష్యకు
         శిష్యుడే దైవంబు చెప్పనిపుడు
మంచిబాట నడువ మందలించెనపుడు
         తిప్పలుఁదప్పవు తిట్టనేడు
శివధనుస్సును విరచినది యెవరనగా?
         నేనుగాదు యెవరో! నేటి పలుకు
ఉచిత విద్యయన్న ఉచితమ్ముగా దోచు
ధనముఁబెట్టిఁ గొన్న దర్పమగును
చదువు బ్రతుకుబాట సాగనిలువలేదు
విద్య కొరకు వెదుక విలువ దెలియు


నేటి విద్యావ్యవస్థలోని ఇబ్బందులను
దీనిలో కళ్ళకు కట్టారు తన్నీరు బాలాజిగారు

తన్నీరుగారి కన్నీరు తుడువగలమా?

తన్నీరుగారి కన్నీరు తుడువగలమా?

సాహితీమిత్రులారా!

పద్యం మీది ఆకాంక్షతో తెలుగుతల్లి ఆవేదనను
తన్నీరు బాలాజిగారి కలంకంటినుంచి స్రవించిన
వేదనాశ్రువులను చూద్దాం
అవి తుడువగలమో లేదో
తరువాత ఆలోచిద్దాం.

ఆంధ్రదేశంబున అద్దంకిసీమలో
       పండరంగ జనిత పసిడిబాల
నన్నయ కాలాన నడకలు నేర్వగ
        కవిబ్రహ్మ పలుకుల కమ్మనిసుధ
శ్రీనాథు నీడలో సిరిమువ్వ హొయలతో
       నాట్యమాడినయట్టి నవ్యతార
పోతనకలమున పొందుగఁ జారిన
         మందారమకరంద మరుల జాణ
ముక్కుతిమ్మనార్యు ముద్దు ముచ్చట్లతో
పెద్దనాది కవుల పేర్మితోడ 
పరిఢవిల్లె తెలుగు ప్రాబంధనాయిక
కృష్ణరాయఁజేరి కృపనుఁబొంద

ముత్యపు సరులతో మోదముఁబొందగ
        గురజాడవారిచే గూర్చఁబడియె
నండూరి ఎంకితో నాయుడుబావకు
       పాటలు నేర్పించి పరవశించె
శ్రీశ్రీ యొసగినట్టి చెంగావి వన్నెల
         సింగారపు ఝరీల చీరగట్టె
భావాభ్యుదయ మేలి పరిఫుల్లరూపమై
        విశ్వంభరాలలో వినుతికెక్కె
అన్యభాష పదాలకు స్తన్యమిచ్చి
నవల, నాటక చరితల నడతఁ బెంచి
తనరె పరిపూర్ణ రాశియై తనదు యింట
నేడు తెలుగమ్మకు నిలువ నీడలేదు

అలాంటి తెలుగుమ్మ ఇలా అంటూంది.

తల్లిపాలు త్రాగి తల్లిని మరచిన 
తల్లి రొమ్ము గ్రుద్దు తనయులార
మాతృక్షీర మధురిమలను మరచినారు
దాది ప్రేమ మాటు దాగినారు

ముదుసలియగు మీయమ్మను 
ముదుసలిశాలకు తరుమగ మురుతురు కొడుకా
ముదుసలియగు ఈ యమ్మను 
ముదసలిశాలకు తరుమగ మోదములేదే

ఆ తల్లి తెలుగు బిడ్డలను 
ఇలా ప్రాధేయపడుతూంది.

చేరదీయుము నన్ను మీసేవఁజేతు
ఆదరింపుము నన్ను మిమ్మాదరింతు
అమ్మప్రేమ, అమ్మనుడియు యమృతముగను
మాతృభాషను, మాతను మరువకెపుడు 

తనరు వంశ కీర్తి తనయ వల్ల

తనరు వంశ కీర్తి తనయ వల్ల

సాహితీమిత్రులారా!

నేటికాలంలో ఆడపిల్ల పుడితే చాలా మంది
తప్పనిసరి పరిస్థితిలో పెంచుకొంటున్నారు
కొందరైతే గర్భంలోనే ఆడపిల్లలను చంపేస్తున్నారు.
ఇలాంటి వారికై మన యువకవి
మహతీ సేవకులు తన్నీరు బాలాజిగారి
పద్యాలను మనం చూసి
అలాంటి వాళ్ళకు చూపుదాం.

ఆడపిల్ల జనింప యవనికి బరువండ్రు
          అవని దేవతయని యంజలింత్రు
ఎదుగు తనయఁజూచి ఎదను కుంపటియండ్రు
         నిక్కమైన సతిని నిప్పుయండ్రు
అమ్మాయి జన్మంబు అడవిలో మానండ్రు
         వెలసిన దేవత వేప యండ్రు
అమ్మాయిఁ బుట్టంగ అయ్యదిగాల్పడు
         ఇంటికి దీపము యింతియండ్రు
తనయుడుదయింప పుకింత్రు తల్లిదండ్రి
తనయఁబుట్టిన శోకించు తల్లిగూడ
అర్థనారీశుని నుతించు  యవనిలోన
ఆడమగ తేడఁజూప ఈయవనిలేదు

చదువులతల్లి యా సరస్వతి బ్రహ్మకు
        నాల్గుముఖంబులన్ నాల్కయయ్యె
సిరుల పంటయగు యాశ్రీలక్ష్మిని హరియు 
        నిక్కముగ ఎదలో నిల్పుకొనియె
సగముతనువునిచ్చి సతికి యా శ్రీపార్వ
         తీశుడు అర్థనారీశుడయ్యె
ముగ్గురు మూర్తుల మూలపుటమ్మను
       ఆదిశక్తిగ నంతా యాదరింత్రు
చెట్టు పుట్టలోన స్త్రీదైవమునుఁ జూచి
రాతిరప్పలోన నాతిఁజూచి
చద్దిముద్దఁబెట్టి చక్కగ మ్రొక్కడి 
తల్లులార! మరియు తండ్రులార!

ఆడపిల్లయన్న అలుసుగాఁజూడకు
అబలకాదు నెలత సబలఁజూడ
కొడుకుకన్న బిడ్డ కురిపించు ప్రేమరా
తనరు వంశ కీర్తి తనయ వల్ల