టెంకాయచిప్ప శతకము

టెంకాయచిప్ప శతకము

సాహితీమిత్రులారా!

శతకాలు అనేకం వాటిలో టెంకాయచిప్ప శతకం ఆంధ్రవాల్మీకిగా పేరు గన్న, వాసుదాసుగా ప్రసిద్ధుడైన వావికొలను సుబ్బారావుగారు 06-04-1925తేదీ ఒంటిమిట్ట కోదండరామస్వామి వారి ఎదుట చదువి శ్రీరామచంద్రులవారికి అర్పింపబడినది. ఇందులో 155 పద్యాలున్నాయి. ఇది ఎక్కువ భాగం తేటగీతులు మిగిలినవి కందపద్యాలు, ఒక్క ఉత్పలమాలతో కూర్చబడినది
అందులోని కొన్ని పద్యాలను ఇక్కడ గమనిద్దాం-

ఆంధ్రవాల్మీకి హస్తంబునందు నిలిచి
రూప్యములు వేనవేలుగఁ బ్రోగుచేసి
దమ్మడైనను వానిలో దాఁచుకొనక
ధరణిజాపతి కర్పించి ధన్యవైతి
కలదె నీకంటె గొప్ప టెంకాయచిప్ప  - 1

కలుగవే కోట్లకొలఁది టెంకాయ లవని
వానిలో నొక్కటైన నీవాసి గనెనె
నిచ్చ రామాబ్జ సన్నిధిని నిల్చి
మచ్చికను మచ్చరితమును ముచ్చటింపు   - 2


చేతిదోడుగ నిన్నాళ్ళు చిప్పమిన్న
గ్రాలితివి నాకు, నింక నీ గాసిదీఱ
నిలుము రామపదాబ్జ సన్నిధిని సతము
నేను వచ్చెద వైళంబ నీకుఁ దోడు    - 3

కాలినడకల నామడల్  లీలగాఁగ
నడచువేళల, నేలపై నడవులందు
మేను వ్రాల్చిన వేళఁ, గౌపీనమాత్ర
ధారినై తిర్గువేళ, నోనారికేళ
ఫలను, వినుఁబాయకుండుట నిలుపు మదిని  - 4

వేలకొలదిని రూప్యముల్ విడిచి, శుష్క
తృణముగా నెంచి నామేడయిల్లువదలి
మేలి జలతారు వలువలు కాలఁదన్ని
నిన్ను గ్రహియించితిని గాదె నిమ్మిఁజిప్ప   - 5

విడిచితి సర్వ ధనంబులు
విడిచితి భోగంబులెల్ల విషయసుఖంబుల్
విడిచితి నిల్లును భూమియ 
విడువను గద నిన్ను నెట్టివేళలఁ జిప్పా  - 6

ఈ విధంగా సరళమైన భాషతో మాట్లాడిన విధంగా
వ్రాయబడింది ఈ శతకం.