పద్యంలో ఉప్పెన

పద్యంలో ఉప్పెన

సాహితీమిత్రులారా!

ఈ కవితను ఆస్వాదించండి...................

            1

నీ మీద నేనొక పద్యం
నీ
వీపు పలక మీదో
చన్నుల గుండ్రాల మీదో
మొదలుబెట్టి నప్పుడు
నువ్వు తెచ్చిపెట్టుకున్న
బడాయి బింకం
        ఈక కలం
        దారులు చేసుకుంటూ
        పైకెగ బాకుతూ
        జారుతూ
        అటూ ఇటూ మళ్ళుతూ
        నా పద్యాన్ని
        నీవంటి వంపుల్లో
        రాస్తూ
        కదిలిపోతుంటే
సడలిపోతుంది

            2

కలం
కితకితలు
నువ్వు
ఇకఇకలు
పద్యం
తీగ లాగా పాకుతూ
నిన్నల్లుకుంటూ
నువ్వు వంకర్లు
తిరుగుతూ
పద్యంలో ఇముడుతూ

            3

ఇదిగో ఇక్కడ
ఇక్ క్ క్కడ
ఇంకా ఖాళీ ఉంది
నిత్యం అదేపనిగా
నీ చెలువాల్ని నాకళ్ళల్లోకి
సుతారంగా తోసే నీ చూపుడు వేలుతో
కలం ఇంకా చేరుకోని చోట్లు చూపిస్తూ
కాస్తాగు
కలం ఇక్కడనుంచి కదల లేకపోతోంది

            4

నామీద
నేను చదువుకోలేని పద్యం
గిలికేస్తున్న కవి గాడా
కాస్త వినిపిస్తావా
ఏం రాస్తున్నావో ఎడా పెడా
అట్లకాడ వెనక
ఇట్టే దాక్కోగలిగిన దానా
ఎట్లా కమ్మేశావ్
నువ్వే నేనెక్కడ చూసినా
హి హి హి
రాయటం అయిపోగానే
చివర సంతకం చెయ్
హి హి

            5

నన్ను నీ చూపుల దారానికి కట్టి
గాల్లోకి ఎగరేసిన
మంత్రగత్తెవు
కృతజ్ఞతగా
నిన్ను నా పద్యంలో బిగించి
నావెంట తిప్పుకుంటాను
ఇవిగో పద్యం కొసలు రెండూ గుంజి ముడి
అంటూండగానే నువ్వు ఉబ్బిపోతావు
కొసలు దగ్గరకు రావు
నేను మళ్ళీ గుంజుతాను

            6

ఒక ఉప్పెన
నామీద విరుచుకుపడుతుంది
అందులో ఉన్న నిప్పుతో
నిన్నూ నన్నూ
అంటించేస్తుంది

            7

వీథి గుమ్మంలో
చుక్కల్నన్నిటినీ
ఒకే గీతతో చుట్టే
నువ్వు
ఇంట్లో
నువ్విచ్చిన కాఫీ తాగే
నేను

-------------------------------------------------------

రచన: తఃతః, 

ఈమాట సౌజన్యంతో