కందుకూరి రుద్రకవి - బలవదరీ శతకం

కందుకూరి రుద్రకవి - బలవదరీ శతకం

సాహితీమిత్రులారా!

కందుకూరి రుద్రకవి రెండు శతకాలు వ్రాసినట్లు తెలుస్తున్నది.
వాటిలో ఒకటి బలవదరీ శతకం, రెండవది ధరశరధీరధీశనుత
శతకంఇవి రెండునూ అలభ్యాలే. కాని మొదటి శతకం లోని కొన్ని
పద్యాలు వేటూరి ప్రభాకరశాస్త్రిగారి చాటుపద్యమణిమంజరిలో
ఉదహరించి వున్నారు. వాటిలో రెండు ఇక్కడ చూద్దాం-

కలశపయోధి మీఁద తరగల్ మఱి హోయని మ్రోయ వేయుభం
గుల తలపాన్పు పాము బుసకొట్టగ నేగతి నిద్రజెందెదో
యలసత తండ్రి చీమ చిటుకన్నను నిద్దురరాదు మాకు నో
బలవదరీ దరీకగహరభస్వదరీ యదరీదరీ హరీ

ఒకవైపు సముద్రం ఘోష పెడుతుంటే, చెవిలో ఆదిశేషుడు
బుసపెడుతుంటే నీకెలా నిద్రపడుతూంది ఓహరీ మాకైతే
చీమ చిటుక్కన్నా నిద్రరాదే - అని వ్యంగ్యంగా శ్రీహరిని
అడుగుతున్నాడు కవిగారు.

అల పగవాని తమ్ముడు భయాతురుడై చనుదెంచినంతటన్
బళిబళి వచ్చితీవనుచు బట్టముఁ గట్టవె లంక కప్పుడే 
కొలిచిన నిన్నె కొల్వవలె కోరిక లిచ్చిన నీవ యీవలెన్
బలవదరీ దరీకగహరభస్వదరీ యదరీదరీ హరీ

ఓ హరీ పగవాడైన విభీషణుడు వచ్చి పాహి అనంగానే
అభయమిచ్చి కాపాడి అప్పుడే లంకకు పట్టం కట్టించావు
కొలిస్తే నిన్నే కొలవాలి కోరికలు తీర్చాలంటే నీవే తీర్చాలి
 అంటున్నాడు కవి.